|
 ซ้าจักหน่อยแต่กะดีกว่าบ่มาค่ะ วันแม่ปีนี้กลับบ้านอีกแล้ว เลยตั้งตนเป็นนักข่าวสังกัดสำนักข่าวน้ำอ้อมดอตเน็ต ขอรายงานข่าวให่ผู้บ่มีโอกาสกลับบ้านวันแม่ได้ฮู้ข่าวนำกันเน๊าะ
 ข่าวแรก (ทีจริงบ่แรกดอกแต่เป็นข่าวที่มีพระเข้ามาเกี่ยวข้องขออนุญาตนำขึ้นก่อนหมู่ค่ะ)
บ่าย ๆ ของวันที่ 12 สิงหาคม 2552 ได้นำเอาหนังสือสวดมนต์ฉบับร่างที่สมาชิกเว็บเฮาซอยกันเฮ็ดขึ้นมาไปถวายพระอาจารย์สมศรี เพื่อจะให่เพิ่นซอยตรวจ พอเปิดผ่าน ๆ เพิ่นกะบอกว่า สิได้แก้หลายหม่องอยู่เด้อ โฮ่ ตามสบายค่ะพระอาจารย์ เต็มที่เลยค่ะ ได้รับหนังสือกลับมาคืนวันที่ 14 ดึก ๆ ผลออกมากะเต็มที่อีหลี แก้มาหลายหม่องตามเพิ่นว่า โดยเฉพาะหน้าสุดท้าย หน้ารายชื่อผู้ร่วมจัดทำหนังสือเพิ่นแก้มาให้สวยงามมาก ๆ เอ้าสาธุนำกัน 5000 แน่ะพี่น้อง สำหรับรายละเอียดของการจัดทำหนังสือฯ ติดตามได้ที่ กระทู้นี้ และ กระทู้นี้จ้า 
เอ้า ย้อนกลับมาดูตอนเช้าวันแม่ก่อน พอดีปีนี้ทางอำเภอเพิ่นจัดงานวันแม่และมีการมอบรางวัลครอบครัวพัฒนาดีเด่นนำ ครอบครัวเว็บมาสเตอร์กะได้นำเด๊อะ สงสัยได้สาขาขายของดีเด่น งานนี้มีคณะกรรมการพัฒนาสตรีอำเภอเกษตรวิสัยเป็นแม่แรงจัดงาน ส่วนใหญ่กะคนบ้านเฮานั่นล่ะ ครอบครัวที่ได้รับรางวัลกะเป็นครอบครัวจากทุกหมู่บ้านของอำเภอเกษตรวิสัย จากตำบลเฮากะ 9 หมู่บ้านรวมบ้านยางจ้อง บ้านหนองแวงน้อยและก็บ้านโนนจานนำ ส่วนรายชื่อจำได้บ่หมดเด้อ เบิ่งภาพเอากะแล้วกัน (ขอบอกงานนี้ สงครามผ้าไหมชัด ๆ )  มาที่วัดบ้านเฮา ตอนเย็นเลยไปถึงดึกของวันที่ 12 คณะกรรมการมูลนิธิวรพรต พิจารณ์ เพิ่นกะจัดงานวันแม่คือกัน จัดติดต่อกันมา 4-5 ปีแล้ว นอกจากการจุดเทียนชัยถวายพระพรฯ ประกวดการอ่านทำนองเสนาะ ประกวดร้องเพลงแล้วไฮไลต์สำคัญกะอยู่ที่การมอบรางวัลแม่ตัวอย่าง ให้กับแม่ตัวอย่างของชาวบ้านน้ำอ้อม อันนี้จัดเฉพาะบ้านเฮา มีคุณแม่จาก 6 หมู่ขึ้นรับรางวัล ลูก ๆ มีโอกาสได้แสดงความรักและความกตัญญูต่อคุณแม่ เบิ่งแล้วกะซาบซึ้งอีหลี เอ้ามาเบิ่งโฉมหน้าคุณแม่ตัวอย่างปีกันค่ะ ไผเป็นไผกะซอยกันเบิ่งเอา
 วันที่ 13 สิงหาคม 2552 อันนี้เป็นกิจกรรมส้มหล่น พอดีว่ามีรายการทีวีจากช่องทีวีไทยเพิ่นมาถ่ายรายการข้าวเม่าบ้านเฮา เลยถือโอกาสทำข่าวจักหน่อย อันนี้กะบ่มีหยังหลาย ถ่าย ๆ แล้วกะไป ทำงานไวมากสมเป็นมืออาชีพ เก็บรายละเอียดพร้อมรูปมาฝากเผื่อมีคนอยากติดตามต่อ รายการเพิ่นชื่อว่า ทุกทิศทั่วไทย ออกอากาศทางช่องทีวีไทย ทุกวันจันทร์-ศุกร์ เวลา 13.30 น. ไผว่างกะรอเบิ่งได้เด้อจ้า คิวของบ้านเฮาน่าจะได้ออกอาทิตย์นี้แหละ (17-21 สิงหาคม) เพิ่นให้ความยาว 6 นาที (ถือว่าเยอะ) ถ้าโชคดีกะจะได้เห็นเว็บมาสเตอร์กำลังกินข้าวเม่ากะได้  กิจกรรมแถม วันที่ 11 สิงหาคม 2552 ทางคณะครูและผู้
ดูแลเด็กเล็กศูนย์พัฒนาเด็กเล็กบ้านเฮา ประกอบด้วย 1 ครูสกุลศรี ไหมคำมูล 2. ครูสณีรัตน์ โพธิ์สุพรรณ 3. ครูรำพรรณ ทับงาม พร้อมกับคณะผู้ปกครอง ผู้นำชุมชนบ้านโนนจาน และเด็ก ๆ จากศูนย์พัฒนาเด็กเล็กบ้านโนนจานได้ร่วมกันปลูกต้นไม้เนื่องในวันแม่แห่งชาติ เห็นบ่ กิจกรรมบ้านเฮาบ่มีแต่ในหมู่บ้านเด๊อะงานนี้ข้ามไปฮอดบ้านโนนจานจั่งซี่ต้องเรียกว่าโกอินเตอร์ของจริง แต่เป็นอินเตอร์วิลเลจเด้อจ้า ยังบ่สุดท้ายเด้อ งานที่ได้รับมอบหมายอีกอย่างนึงกะคือ การมอบเงินบริจาคเพื่อร่วมสมทบทุนซื้อต้นประดูกิ่งอ่อนมาปลูกให้กับโรงเรียนบ้านน้ำอ้อม น้องบ๋อมเพิ่นฝากให้มอบให้กับอาจารย์ประชัน ขอแจ้งว่ามอบเรียบร้อยเด้อจ้า อาจารย์เพิ่นบอกว่าถ้าซื้อปลูกแล้วกะจะอัพเดตข่าวผ่านทางเว็บนี้ล่ะจ๊ะ รอติดตามกันได้เด้อ บอกแล้วว่ายังบ่สุดท้าย มีอีก คือ คืนวันที่ 12 ที่มีการจัดงานวันแม่ของบ้านเฮา มีโอกาสเจอกับอาจารย์บวร โพธิ์สุพรรณ ได้ยินแว่ว ๆ ว่าเพิ่นเว้าถึงประวัติบ้านน้ำอ้อม เลยถือโอกาสขอซึ่งหน้าเลย เพิ่นกะรับปากเป็นมั่นเหมาะ คาดว่าเร็ว ๆ นี้ เว็บเฮากะคงจะมีประวัติบ้านเฮามาเผยแพร่ให้รับรู้ทั่วกันเด้อ คอยอีกจั๊กหน่อย เห็นบ่ ได้เวียกอีหลี เจอกันอีกเทือตอนมีโอกาสทำข่าวเด้อจ้า เว็บมาสเตอร์ (ขวัญ) 
|
